John 21
Yeesus ona teeria mua papako wiar imenarek
1Aria iir oko-pa Yeesus teeria Taiberias eka saawirinowa-pa ikaiwkin nainiw wiar imenarek. Wiar imenarek nain sira feenap. 2Saimon Pita, Tomas, eena unuma oko Didimus, Nataniel, Kaana owow mua-ke, wi Galili kame, Sebedi muuka wiam erup ne nainiw mua erup, wi naap nan ikemik. 3Ne aria Saimon Pita-ke wia maakek, “Yo mera sia wafurowa ikiwiyem.” Ne wis-ke maemik, “Is pun nookiyen.” Aria wi unowiya orop aasa suuwap sia wafuramik. Iir nain uura mera kuisow akena-ko me aawemik.4Naap ikaiwkin uuriw epa wiimeya Yeesus imenarep eka pona-pa iimarep ikua. Wi urufap mua oko-ke naemik. 5Ne wia farek, “Nee, emar unowik, ni mera-ko aaweman-i?” Ne maemik, “Weetak akena oo.” 6Aria wia maakek, “Sia aawep aken ekeria-pa wafureka, naap onap mera aawowen.” Naap wia maakeya sia aawep aken ekeria-pa wafuramik-na mera unowa akena wiar iwak. Mera kerew akena, naeya sia purupep aasa-pa wuowa me pepek.
7Naeya Yeesus ona teeria mua oko senam akena kookaliya, mua nain-ke Pita maakek, “Mua nain yiena Maneka-ke.” Naap maeya miimap ona mia suuwowa iirarep-puak nain aawep aep eka pikinek. 8Ne mua papako aasa-pa nan ikok mera sia aas onaiya pepamik. Wi me epasia-pa ikemik, andet mita naap.
9Wi urupemik-na mukuna urufamik. Mera mukuna-pa ikua, ne emer ikowa pun mukun mamaiya-pa nan ikua. 10Ne Yeesus-ke wia maakek, “Mera aaweman nain papako pepeka.” 11Naeya Saimon Pita-ke orop aasa ekap mera mane-maneka nain sia onaiya mufep iiwawun pona purupok. Mera senam akena, 153 naap iwomakek nain sia me puok. 12Aria Yeesus-ke wia maakek, “Aria feek ekapep maa-ko enimeka.” Ne wi kema unu-unowa wuap mua kuisow kekanep-ko me nokaremik. Moram wi amisaremik, o wiena Maneka-ke. 13Aria Yeesus ekap emer ikowa aawep wienakep-puap mera wienakek.
14Aria o umep iikirap ikok ona teeria wiar imenarem-ikua nain aakisa imenarek fain-ke arow arek.
Yeesus Pita maakek, “Yena teeria wia kakalte.”
15Aria wi maa enep weesereya Yeesus-ke Saimon Pita nokarek, “Oo Saimon, Yon muuka, wi teeria fain yo efa kookalimik, nain nos-ke manek akena efa kookalin-i?” Ne Saimon-ke, “Ae, Maneka, no efa amisaren, yo nefa kookaliyem.” Naeya maakek, “Yena sipsip muuk teeria baliwep wia kakalte.” 16Naap ikok nainiw nokarek, “Oo Saimon, Yon muuka, yo efa kookalin-i?” Ne Saimon-ke maakek, “Ae, Maneka, yo nefa kookaliyem nain no amisaren aa.” Naeya maakek, “Yena sipsip teeria baliwep wia urufam-ike.” 17Naap ikok kiiriw nainiw nokarek, “Oo Saimon, Yon muuka, yo efa kookalin-i?” Ne naap nokarowa arow areya kema pinarek. Ne maakek, “Maneka, no maa unowa amisaren. Yo nefa kookaliyem nain pun amisaren!” Naeya maakek, “Yena sipsip teeria baliwep wia saalolokam-ikome.” 18Naap maemi kiiriw maek, “Yo makena nefa maakiyem, no takira ikok konima nena ainep inakirowa kaikap epa kaanek soomarowa nain nena kookalowa-pa soomarem-miawon. No ikoka panep wapena tiinowap ikaeya mua oko-ke inakirowa kaikomep epa me kookalin neeke nefa pikiwinon.” 19(Opora fain Pita opor kokosa maakek, ikoka o kamenap umemi Mua Maneka unuma pirinon nain.) Naap ikok kiiriw maakek, “Aria no naap yookam-ike!”20Ne wi ikiwem-ikok Pita kirek-na mua oko murarep wiokam-ikaeya urufak, eena Yeesus o senam akena kookaliya nain. Iiriw wi Pasowa maa enemi os-ke maar muutiw kirep nokarek, “Maneka, mua naareke wi iiwua wapena-pa nefa wuinon,” mua nain. 21Ne aria iram-ikok Pita-ke Yeesus nokarek, “Maneka, mua nain ikoka kamenap arinon?” 22Naeya maakek, “O naap ikaeya yo nainiw miiwa ekapinen nainen pun eliw, me no maa-ke. No naap yookam-ike.” 23Ne opora nain-ke manekareya mua nain me uminon naem-ikemik. Nain Yeesus naap-ko me maek, mua nain me uminon, o maek, “Mua nain naap ikaeya yo nainiw ekapinen nainen pun eliw, me nena maa-ke,” naap maek.
24Aria mua nain-ke opor unowa fain makena-ke naep ona siisimomakek. Ne i amisaremik, opor makena maek. 25Yeesus maa unow akena onomakek. Maa unowa nain iiwawun siisimekamik-na maifa unowa nain-ke miiwa epa siineya kamenap onekamik.
Copyright information for
MHL